أمس كنت في ديوانية كويتية بكل ما تحمله من معنى
شباب من كل مناطق الكويت
الحضري والبدوي
والسني والشيعي
والمهندس والعسكري
والطالب والطبيب
واللي يشجع العربي واللي ما يحب إلا القادسية
واللي يعتقد أن داوود حسين أحسن ممثل في الكويت
واللي يقول أن الفن مات بموت خالد النفيسي
اي موضوع ينطرح في الديوانية
لازم تلقى أراء مختلفه فيه
هذا مؤيد وهذا معارض
وهذا مو قادر يحدد موقف
والرابع ما يدري شسالفه
قول الخصخصة وتلاقيهم صاروا ماشاء الله خبراء اقتصاديين
اذكر الرياضة وتحصل الواحد منهم صار فتحي كميل والثاني جاسم يعقوب
تهور واذكر اسم مسلم البراك تلاقيهم شوي ويتهاوشون مؤيديين ومعارضيين
واذا وزتك نفسك الأمارة بالسوء ويبت طاري الخرافي يا ويلك ويل
اللي يقول هو سبب انبطاح المجلس
واللي يقول هو صمام أمانه
بس
شفتوا قوم صالح هذيلا اللي ما يتفقون بالإجماع على رأي واحد؟
جميعهم
بدويهم
وحضريهم
وشيعيهم
وسنيهم
متفقين على أن هناك من يعمل على تقسيم هالبلد
والاحداث اللي قاعدة تصير هالأيام
من تأبين وضرب مجاميع القبائل وجويهل وعلى عزايز وقنوات الفساد الإعلامي
ما هي إلا جزء من مخطط خبيث
لجعل كل كويتي ينقسم حتى على نفسه
طيب ليش؟؟؟
شالهدف؟؟؟
شالفايدة؟؟؟
ما تدرون أن مثل هذا المخطط أول ما يدمر يدمر البلد؟
ما تشوفون شسوى بغيرنا؟
ما تخافون تفلت الأمور ولا تقدرون تلمّونها؟
تذكرون نبيها خمسة ؟
تذكرون كتلة التسعة وعشرين نائب؟
كم حضري فيها؟
كم بدوي فيها؟
كم سني فيها؟
كم شيعي فيها؟
تدروون شنوا يعني للبعض تجمعكم بكتلة وحده؟
أوههوووو
يعني الكثير الكثير
الحلم المرعب المزعج والكابوس الأكبر
عشان جذي بدأ مسلسل التقسيم
ولا يزال جاري
والله يستر على البلد منه
واللي يقدر يقرأ الطالع والبخت والمستقبل
خل يبلغنا
الجماعة هذيلي
وين ماخذينا معاهم؟؟؟؟؟
